Мен Абдуллаев Мухаммед. Кефе шеэри Ближнее коюнинъ 15 санълы мектебинде 5-нджи сыныфта окъуйым.
Мен озь коюмни, окъугъан мектебимни, аилемни, якъынларымны пек севем.
Эджатларымнынъ тарихинен меракъланам. Эр бир мусульманнынъ эвинде тёрде къуран китабы асылы тура.
Бизим эвимизде де бойле бир къуран бар.О учьюз йыллыкъ къурандыр.
Онынъ тарихы пек меракълы.
Къуран эски, йылты эскирген, йыпрангъан, амма бу айлемизде энъ къыйметли мирастыр.Чюнки къуран окъумакъ – дува окъумакъ, тилек этип Аллагъа ялвармакътыр.
Фатиме къартанам айткъанына коре бу къуранны онъа Медине къартанасы эдие эткен. Къарткъартанама да онынъ Азизе анасындан мирас къалгъан. Бойлеликнен бу къуран несиль несильден кечип бизге мирас къалгъан.
Фатиме къартанам бу къурандан ясин – сурелерни окъуй ве кимде ким хасталанса , бу къурандан окъуса, адам тедавилене. Фатиме къартанам ве Аблямит къартбабам бу къураны пек эйбетлейлер.
Мектебимизде этнографик кошеси ачылгъанда, бу къуранны мен къартанамдан сорап, бунда кетирдим, чюнки чокъ сыныфдашларым, достларым бу къураннен меракъланды. Энди къуран мектеп музеинде тура ве эр кес онынъ тарихинен таныш ола.
Биз яшлар бойле мирасны, байлыкъны сакъламакъ керекмиз, кечмишни унутмамакъ - бизим борджумыздыр
Комментариев нет:
Отправить комментарий