Ибрагимова Асие "Козь бебеги киби сакъла"

Ибрагимова Асие (МБОУ Красногорская СОШ Ленинского района, 7 класс)  

Козь бебеги киби сакъла

     Февральнынъ башларында оджамыз  «Аиле дегерликлери» деген ярыш элян этильгени акъкъында айтты. Ярышнынъ макъсадынен, шартларынен таныштырды. Бирден козь огюме тизанамнынъ кумюш къушагъы пейда олды.

      Вакъытны созмай къарт битамнынъ эвине бардым. Къарт битам докъсан бир яшында, сачлары чаларгъан, муляйим бир къадын. Докъсан бир яшында олсада бугуньгедже бизлерге чорап оре.

      О, эвде бир озю эди. Мени гузель къаршылап алды, эвдеки ве мектепте олгъан хаберлерни сорады. Тавалокъумнен чай ичип баягъы лаф эттик. Мен онъа ярыш акъкъында айттым.

       Къарт битамнынъ одасында эскиден къалгъан сандыкъкъа козюм тюшти.  Онынъ ичинде мен киби къызчыкънынъ экиси сыгъа биле. Бу сандыкъ къарт битамнынъ келинлик сандыгъы олгъаны битамдан эшиткен эдим. О нишанладжакъта дайысы Кезлевнинъ усталарына оны сымарлагъан. Бу сандыкъ, къарт битам  киби Къырымдан къувулгъан вакъты Озьбекистангъа тюшип Къырымгъа къайтты. Сандыкъ ичиндеки шейлер, джиезлер ачлыкъ вакъты бир зенгинлик сайылгъан. Къарт битам дюльбер, пуллу фесини, зинет-инесини, инджисини бир пиала къатыкъкъа денъиштирип дайысынынъ, каделерининъ джаныны къутаргъан.

      Дейджегим, сандыкънынъ ичиндеки зенгинлик  кеткен сайын эксиле берген. Тек кумюш къушакъны ич бир шейге денъиштирмеген.

      Къарт битам «Бисмилля» деп, яваш сандыкъны ачты. Богъчаларнынъ тюбюнден бир къутучыкъ чыкъарды. Онынъ ичинден кумюш къушакъны чыкъарды, агълап опьти, сыйпады, сюртти. Бу къушакъ онъа пек къыйметли бир тюс олгъаныны анъладым. Бу къушакъны къарт битамнынъ белине той куню дайысы такъкъан эди.

      «Бу къушакъ манъа анамдан мирас, хатыра оларакъ къалды, - деди къалтыравукъ сеснен къарт битам. О, ольгенде мен учь яшында эдим. Бу къушакъ эр вакъыт янымда эди, анамны анъдыра эди. Манъа бахыт кетирди. Къызларымнынъ кичкенесине, мектепни битиргенде, багъышладым. Онъа да о бахыт кетирди. Окъуды, эвленди, белли инсан олды. Сен билесинъ, эки огълу бар, огълан торуны бар. Къызы ёкъ… Айткъанына коре бу къыйметли къушакъны санъа багъышлайджакъ. Санъа ляйыкъ деп сая.»

       Яваштан къапу ачылды. Тизанам иштен кельди. Мени корип къуванды. Козю къушакъкъа тюшти. Манъа бакъты, сонъ къарт битама.  Къарт битамнынъ козьлери яшланды. Къушакъны алып мени белиме такъты. «Бу бизим аиле дегерлигимиз. Оны козь бебеги киби сакъла», - деп мени къучакълады. Къарт битамнынъ козьлери йылтырай эди.