Массудова Сефае «Къалайлы къазан»

Массудова Сефае (МБУМ «11-нджи гимназия»7-нджи сыныф талебеси)

«Къалайлы къазан»

Меним адым Сефае, озюмнинъ ишимни  аилемизде юз йылдан  зияде дегерлигимиз  «Къалайлы къазан»гъа багъышлайым.

Къорантамыз буюк ве достлукъта яшай,

Къазангъа бакъып Фера битамызны хатырлай.

Бизим аятымызны кечмиштен меракълы ве муим хатыралар толдура. Кечмишимиз олмаса, илеримиз де олмаз. Эр бир аиледе, эр бир эвде озь  аиле дегерлиги олмакъ керек.

Меним битамнынъ анасы Фера эди. Онынъ къорантасы Багъчасарай  шеэринде яшай эдилер. Фера битамнынъ къорантасы пек балабан эди. Ана бабасында еди бала бар эди. Олардан бириси Фера битам эди.
 Битам  балалардан энъ буюги эди. Фера битама къазан анасындан къалды.

 Бу къазан йигирминджи асырнынъ башында пейда олды. Къалайлы къазанда япракъ сармасы пишириле эди.  Къазанны къартбабам чокъракъта темизлей экен.

Сюргюнлик олгъанда, меним Фера битам къалайлы къазан ичине  сары ягънен бир чувалчыкъ ун ташламагъа етиштирди. Узун,агъыр ёл девамында битам трен тохтагъанда, аман-аман шу къазанда къамыр  басып,  онынъ ичинде  къуру пите пиширип, озь кичик къардашларыны ашата эди.  Шу къазанчыкъ  фаджиалы ёл девамында, оларны ачлыкътан къорчалады.

Озбекистангъа кельгенинен бизим халкъымызнынъ вазиети пек агъыр эди. Шу куньлеринде де къалайлы къазан битама пек ярдым этти. Чюнки битамнынъ айткъанына коре, къазанда къайнатма, къавурылма шорбалары пишириле. Шу къазанчыкъ чоинчик ерине де къулланыла экен. Демек, боткъалар ве пилявлар пиширильсе, ашлар къазаннынъ тюбюне япышмай экенлер.

Бу къазангъа битам айры къыймет кесе эди.  Биринджиден, узакъ Озбекистанда яшагъанда,  Фера битамны бу къазан эм ачлыкътан къорчалагъан, эм де анасындан хатыра эди.

Фера битам Ана-Ватанына къайтып, озюнънен къалайлы къазанны алып кельди. Мен кичкене олгъанда, битам шу къазанда бизге пахлава къавура эди.

Къазан бираз сувуса битам тез-тез оны темизлеп къоя эди. Бугуньки кунюмизде бу къзанчыкъта анам бизге Ораза я да Къурбан байрамына пахлава къавура.

 Къалайлы къазан  бизим аилемизде дегерлик киби яшай. Биз оны бош тутмайыкъ, анам онынъ ичине татлы емеклерини къоя. Куньде биз къалайлы къазанчыкътан лезетли емек алсакъ, Аллагъа бугуньки кунюмизге шукюрлер этемиз.

Эльбетте, Фера битамызна хатырлаймыз. Бу къазанчыкъ ярдымынен Фера битамнынъ къардашлары ачлыкътан къорчаландылар.

Онынъ ичюн де, бизим аилемизде бу къазан муим роль ойнай.
Иншалла, меним къорантам олса, къалайлы къазанчыкънынъ муимлигини, Къырымдан Озбекистангъа ве кене де Ватанымызгъа къайткъаныны озь балаларыма тариф этерим.