Ибраимов Ридван Къадимий Къуран

Ибраимов Ридван

Къурман районынынъ Къурман–Кемельчи къасабасы МБУМ «Къурман №1 мектеби» 10-А сыныф талебеси

Къадимий Къуран

Бизим аилемизде чокъ йыллар девамында пек эски, къадимий десем оладжакъ, бир китап бар. О китап меним битамнынъ битасынынъ Къураны. Япракълары сараргъан, пармакъларнен чокъ тутулгъаны ичюн ипрангъан. Бу Къуран XIX асыргъа аит. Чокъ йыллар девамында бу Къуран къорантамызнынъ аиле дегерлигидир. 

Битам Фоти-Сала коюнде яшай эди. Онынъ адыны бильмеймиз. О, медреседе Къуранны окъумагъа огрете эди. О заман къызлар акъайгъа эрте чыкъа эдилер. Битам акъайнынъ эвине кеткенде, анасы онъа эвиндеки Къуранны бере. Битамнынъ догъгъан кою – Фоти-Сала.

Бизим халкъымызнынъ аджайип бир адети бар: келин ана-бабасынынъ эвинден чыкъкъанда , анасы онъа Къуран бере. Яш къоранта намуслы яшасын, урф-адетлеримизни , динимизни кутьсин деп.

Совет вакъытларында Къуран сатып алмасынынъ чареси ёкъ эди, онынъ ичюн аналар къызларгъа озь Къуранларыны бере эдилер.

Къуранымыз несильден-несильге кече эди: Хатидже битамдан, Фазиле битама, Фазиле битамдан Наджие битама, Наджие битамдан Шекуре битама, Шекуре битамдан, меним анама, Зейнепке.

Фазиле битам 1899 сенеси дюньягъа кельди. О, битам киби, Къуранны окъумагъа огрете эди.

Фазиле битамда секиз бала эди, учь огълу сюргюнликте ольди. Беш баласы сагъ къалды: Наджие, Осман, Руслан, Юзуф ве Исмет. Юз йылгъа келип, Фазиле битам 1999 сенеси вефат этти.

Наджие битам 1932 сенеси Фоти- Сала коюнде догъды. Онынъ учь баласы бар эди: Шекуре, Нариман ве Анифе. Битам пек диндар бир къадын эди.
2009 сенеси битам вефат этти. Акимова Шекуре Абдураман къызы. Шекуре битам 1954 сенеси Алмазарда дюньягъа кельди.

Шекуре битамнынъ учь баласы бар: эки огълу (Арслан, Ибраим) ве бир къызы (Зейнеп). 2011 сенеси, октябрь 9-да, элли еди яшкъа келип, Шекуре битам вефат этти.

Меним анам, Зейнеп, акъайгъа чыкъкъанда, янъы Къуран тюкяндан алмагъа чареси бар эди. Сонъки йыллары, чешит тюрлю, дюльбер къаплы, янъы Къуранлар чыкъты. Амма Шекуре битам, анама аиле дегерлиги, битамлардан къалма Къуранны берди. Шимди бу къадимий китап бизим аилемизде энъ буюк тёрде тура. Бу китапнынъ саиби олгъан къорантамыздаки эр бир къадын намуслы, мераметли омюр яшагъан.

Бу аилемизнинъ дегерлигини сакълап къалмакъ, келеджек несиллеримизге теслим этмек, меним къыз къардашым, Зеранынъ борджудыр.

«Мукъаддес Къураннынъ саиби олурым ве битамдан къалгъан мирасны буюк гъурурнен сакълап келирим!» – дей Зера къардашым.